إنجي المقدم لـ"ترند ريل": صوفيا الأقرب لقلبي.. والدراما سلاح قوي لتغيير المجتمع
في تصريحات خاصة لـ"ترند ريل"، فتحت الفنانة المصرية إنجي المقدم قلبها وتحدثت بصراحة عن مسيرتها الفنية ومواقفها من قضايا المرأة والمجتمع، مؤكدة أن كل شخصية قدمتها تركت فيها بصمة خاصة، لكنها تكن مكانة استثنائية لشخصية "صوفيا" التي جسدتها في مسلسل "ليالي أوجيني".
وقالت إنجي: "كل الشخصيات اللي عملتها محببة ليا، أثرت فيا وأنا أثرت فيها، لكن أكثر شخصية قريبة من قلبي هي صوفيا، لأنها كانت مركبة ومليئة بالمشاعر والتفاصيل الإنسانية".
عن سر نجاحها واستمراريتها، أوضحت أن مفتاح قوتها هو الإصرار والمثابرة، وأضافت: "أنا مصدر قوتي إني دؤوبة زي النملة والنحلة بس من غير زن عندي دائمًا إصرار ولما بكون مؤمنة بحاجة ببقى واثقة إنها هتحصل في أي وقت، مش مهم امتى، بس هتحصل".
ووجهت رسالة للمرأة، قائلة: "نصيحتي لأي ست إنها تكون نفسها تكون حقيقية وعندها ثقة في نفسها وفي قدرتها إنها تقدر تعمل كل حاجة بضمير".
وعن التمييز بين الرجل والمرأة في سوق العمل، علّقت قائلة: "أنا مش بحس إن في تمييز في الشغل لأن كده كده المجتهد بيوصل لكن نقدر نقول إن في مجالات زي الفن، الشكل والسن ممكن يتحكموا أكتر في اختيارات السيدات، وده أحيانًا بيقلل من فرص الموهوبات".
ولم تتجاهل إنجي الحديث عن بعض القوانين التي قد تكون مجحفة بحق النساء، حيث قالت: "أكيد في حاجات في القوانين فيها إجحاف للست أنا مش ملمة بكل حاجة لكن في بعض القوانين لازم تتغير ولو الناس اتعاملت بضمير احنا مش هنحتاج القانون أصلًا".
أما عن تأثير الدراما على المجتمع، فأكدت أنه دور محوري، مستشهدة بتناول قضية التحرش بالأطفال في الأعمال الفنية مؤخرًا، والتي ساهمت في زيادة الوعي المجتمعي. وقالت: "الناس بدأت تفهم وتتعاطف، والمجتمع شاف الضحية ضحية فعلًا، ومبقاش المفروض يتكسف أو يدفن راسه".
وفي ردها على تبادل الأدوار بين الرجل والمرأة قالت إنجي: "أنا مش عايزة ألعب دور الراجل، أنا ست وحابة أفضل ست إحنا جايين نكمل بعض مش نتخانق".
واختتمت حديثها بالتأكيد على أهمية التوازن بين الحياة الشخصية والمهنية، قائلة: "بيتي هو رقم واحد في حياتي وشغلي هو أنا وبحاول دايمًا أوازن بين الاتنين وعمر ما حد فيهم جه على حساب التاني".