"مسلسل 220 يوم أصابني بالكوابيس".. أبرز تصريحات كريم فهمي لـ"كلام نواعم"
كشف الفنان كريم فهمي أن مشاركته في مسلسل "220 يوم" كانت من أصعب تجاربه الفنية على المستوى النفسي، مؤكدًا أنه ما زال يعاني من كوابيس حتى بعد انتهاء التصوير.
وقال كريم فهمي خلال استضافته في برنامج "كلام نواعم" عبر شاشة MBC:"المسلسل دا عملي كوابيس، ولحد النهاردة بصحى من النوم في كوابيس رهيبة لأني قعدت سنتين أو أكتر شغال عليه، تعبني نفسيًا جامد من أول الكتابة لحد ما خلصنا تصوير".
قصة حب يواجهها "المرض"
تطرق كريم فهمي إلى تفاصيل القصة، مشيرًا إلى أن العمل يدور حول علاقة حب بين أحمد ومريم، لكن التحدي الأكبر في المسلسل أن "المرض" هو الشرير الحقيقي الذي لا يمكن السيطرة عليه.
وأضاف:"أصعب حاجة إن الشرير بتاع العمل أنت مش عارف تمسكه بإيدك، لأنه المرض.. البطل مرضيش يقول لمراته لأنها كان عندها حلم بقالها 7 سنين نفسها تخلف، ولما بقت حامل اكتشف أنه مريض، وقرر يخبي عنها.. ربنا يبعد عننا".
الصراحة مع زوجته في الواقع
وعن المقارنة بين شخصية البطل الذي أخفى مرضه وبين حياته الشخصية، أوضح كريم أنه لا يميل إلى إخفاء أسراره عن زوجته:"أنا بحب المشاركة.. الصراحة مهمة لأن الزوجين بقوا واحد في كل حاجة، عمري ما بخبي حاجة عن مراتي، هي اللي بتشيل المعلومة عني لأني ذاكرتي ضعيفة".
هدوء وثبات أمام الكاميرا
كما تحدث الفنان عن فلسفته في التعامل مع الأسئلة خلال البرامج الحوارية، قائلاً:"أنا لا أحسب كل شيء بدقة، لكن رد فعلي لازم يكون محسوب مع هدوء كامل لأننا على الهواء، خبرات الحياة علمتني أن الردود لازم تكون مدروسة.. الناس ممكن تعتبرنا قدوة حتى لو مش قصدنا".
وأكد أن هدفه هو ترك أثر إيجابي لدى الجمهور حتى في مواجهة الأسئلة المستفزة، معتبرًا أن مع مرور الوقت يبدأ المشاهدون وصناع البرامج في فهم شخصيته بعمق أكبر.
مفهوم الحب في نظره
أما عن رؤيته للحب، فأكد كريم أن المشاعر تنضج مع مرور الزمن والتجارب، وقال:"الكلام عن الحب بيتغير مع الوقت والخبرة والصعوبات اللي بنعيشها سوا، استشهدت بجملة من المسلسل مع صبا مبارك: "أنا دلوقتي بحبك بشكل تاني خالص، شكل أحلى بكتير من الأول".
مراحل من طفولته
كما تحدث كريم فهمي عن مراحل طفولته قائلا :" اشتغلت في عمر 16 سنة بعد انفصال والدي ووالدتي، ووقتها مكنتش مدرك إني كدة بشتغل في سن صغير ودائمًا بقول لأي حد مر بصعوبات أنه يحمد ربنا علي كل الوقعات والصعوبات اللي واجهتك، لأن الأشياء دي هي اللي بتكوّن حياتك وشخصيتك بعدين".
وتابع :" ربنا دايمًا بيعمل أعظم سيناريو في حياة البني أدم، واللي عملهولي هو اللي كوّن شخصيتي، واللي حصل وأنا 16 سنة، الانفصال بتاع الأهل هو اللي خلاني أكون مسؤول عن نفسي من الألف للياء وحسسني بقيمة القرش والعائلة ".
حديث كريم فهمي عن بناته وزوجته
كما تحدث عن بناته، قائلًا :" أنا الحب الأول في حياة بناتي، والتربية عندي فيها نوع من التوازن، ودانيا مراتي بتربي بشكل مختلف، وأول ما اتعرفت عليها كنت لسه بادئ تمثيل وكنت عايز أشتغل على فيلم بيبو وبشير وكانت دايمًا تقولي بحبك تكون مؤلف أكتر من ممثل".