ليلى علوي في الجونة: "لا للتبذير.. الطعام مسؤوليتنا وفننا وسوشيال ميديا أداة للتوعية"

تحدثت النجمة ليلى علوي في حلقة نقاشية بعنوان "السينما ومذاق الحياة.. الطعام، الفن، والمسئولية الاجتماعية" ضمن فعاليات مهرجان الجونة السينمائي في دورته الثامنة، مؤكدة على دور الفن والإعلام في تعزيز الوعي الغذائي والاستهلاك المسؤول.

وقالت ليلى علوي:
"السوشيال ميديا النهاردة ليها تأثير قوي، لكن لازم نستغلها في نشر الوعي مش بس في الترفيه. إحنا في الشرق الأوسط عندنا مشكلة كبيرة في إهدار الطعام، ولازم نبدأ التغيير من كل بيت. والدتي الله يرحمها كانت دايمًا تقول ما فيش أكل يترمي، لازم نعرف إزاي نستفيد منه ونستخدمه بطريقة صحية."

وأضافت:
"في أوروبا بدأوا يتعاملوا مع فكرة الترشيد بجدية، وبيشتروا كميات صغيرة من الأكل حسب الحاجة. إحنا كمان لازم نتعلم ده، ونركز على التوعية الغذائية، لأن الأجيال الجديدة ما عندهاش إدراك كافي عن أهمية الأكل الصحي وكيفية التعامل مع الطعام."

وأشارت إلى بعض الممارسات اليومية الخاطئة التي قد تضر بالصحة دون وعي، قائلة:
"في حاجات بسيطة لازم الناس تعرفها، زي إن الأرز لما يتحط في التلاجة ويتسخن تاني ممكن يبقى فيه بكتيريا ضارة جدًا. الحاجات الصغيرة دي محتاجة توعية عامة."

واستكملت حديثها مؤكدة على أهمية نشر ثقافة الوعي الغذائي من خلال الفن والإعلام:
"الموضوع مش رفاهية، دي مسئولية تجاه نفسنا وتجاه المجتمع كله. لو بدأنا من هنا في مهرجان الجونة، نقدر نوصل رسالة حقيقية للعالم عن أهمية الغذاء الآمن والاستهلاك المسؤول."

تأتي هذه الحلقة ضمن جهود مهرجان الجونة السينمائي لتعزيز الحوار حول القضايا المجتمعية والإنسانية، وتسليط الضوء على أهمية استغلال الفن والإعلام في نشر الرسائل الإيجابية حول الصحة والتغذية والاستهلاك المسؤول، بما يتوافق مع شعار المهرجان "سينما من أجل الإنسانية".