خاص..هدي الأتربي : أصعب مشاهد «نؤة» بين الحب والانتقام..ولا أؤمن بالعلاقات من طرف واحد
كشفت الفنانة هدى الأتربي في حوار خاص ل "ترند ريل" عن تفاصيل تجربتها مع شخصية "نؤة" التي قدمتها من خلال مسلسل "
مناعة" ، حيث اعتبرتها من أصعب الأدوار التي جسدتها ، لما تحمله من تحولات نفسية حادة وصراع داخلي بين الحب والانتقام
وأكدت أن العمل شكّل محطة مهمة في مشوارها، خاصة مع تفاعل الجمهور الكبير مع الشخصية حيث تتحدث هدى عن كواليس الدور، ورؤيتها للعلاقات، ومواصفات شريك حياتها، إلى جانب أحدث أعمالها الفنية.
في البداية.. ما أصعب مشهد قدمتيه خلال العمل؟
أصعب مشهد بالنسبة لي كان مواجهة “نؤة” مع كمال، لما بتقوله “متصدقش نفسك، فوق من اللي إنت فيه” المشهد ده كان مليان مشاعر متضاربة، لأن الشخصية بتتحول من إنسانة محبة ومعطاءة طول الوقت، لشخص تاني خالص بيدور على كرامته وعايز ينتقم لنفسه.
التحول ده نفسيًا كان مرهق جدًا، لكنه في نفس الوقت حقيقي، وخلاني أؤمن إن على قد الحب الكبير بيكون الكره بنفس القوة.
لو كنتِ مكان نؤة.. هل تختارين منعم أم كمال؟
منعم شخص بيحبها بصدق، وعايز يكون موجود في حياتها ويدعمها، لكن أنا بشكل عام ضد فكرة الحب من طرف واحد، أي علاقة لازم يكون فيها توازن ومشاعر متبادلة، غير كده بتكون مرهقة ومش صحية.
ما هي مواصفات فارس أحلامك؟
أهم حاجة يكون بيحبني بصدق ويدعمني، ويفرح لنجاحي من غير ما يحس بغيرة أو ضيق و لازم يكون واثق من نفسه، لأن الثقة بتفرق جدًا في أي علاقة أنا مش بحب الشخصيات الضعيفة أو اللي معندهاش طموح.
كلمينا عن أجواء التصوير؟
الأجواء كانت فيها التزام كبير جدًا، وكل فريق العمل كان متعاون وعارف هو بيعمل إيه، وده ساعدنا نطلع الشغل بالشكل اللي الناس شافته.
لو حياتك فيلم رومانسي.. هيكون عنوانه إيه؟
ممكن يكون “بتخونوه وعمره ما خانكم”، لأن النوع ده من القصص بيشدني جدًا وبيحمل مفارقات إنسانية قوية
إيه أغرب شائعة اتقالت عنك؟
بصراحة أنا مش بهتم بالإشاعات خالص، ومش بسيبها تأثر عليّ.
هل تتبعين قلبك أم عقلك؟
في أغلب الوقت قلبي، لكن عندي مبدأ واضح، لو حسيت إني مش متقدّرة أو الطرف التاني مش شايف قيمتي، بمشي فورًا حتى لو بحبه جدًا.
ما أكثر الصفات التي تستفزك في الرجل؟
الكذب طبعًا، وكمان إن عينه تبقى زايغة أو يكون مش واثق من نفسه، الحاجات دي بالنسبة لي مرفوضة تمامًا.
في رأيك.. هل المرأة يجب أن تكون قوية أم مدللة؟
لازم تكون قوية جدًا وقادرة تعتمد على نفسها، لكن في نفس الوقت من حقها تتدلع وتتقدّر مع الشخص اللي بيحبها.
لو لديكِ زرار تمسحين به شيئًا من حياتك.. ماذا تختارين؟
أكيد التجارب القاسية اللي مريت بيها، رغم إني مؤمنة إنها علمتني كتير.
كيف يمكن لشخص معجب بكِ أن يلفت انتباهك؟
يبذل مجهود ويكون صبور، لأنني لست شخصية سهلة، وبحتاج وقت عشان أثق في أي حد.
هل ترين أن الجمال نعمة؟
طبعًا نعمة، لكن مش هو الأساس لأنه مش دائم، اللي بيفضل هو التاريخ والأعمال والتأثير الحقيقي في الناس
.
ماهي الرسالة اللي تقوليها لنفسك بعد خمس سنوات؟
هقول لنفسي إني فخورة بكل التجارب اللي عديت بيها، وإنها كانت سبب إني أقف على رجلي وأكمل، حتى لحظات الفقدان كانت ليها دور إيجابي في تكويني
هل التجارب الصعبة تغير الإنسان؟
أكيد، بتخليه أكثر إحساسًا بالناس اللي حواليه، ويقدر على فهم مشاعرهم والتعاطف معاهم.
هل هناك أعمال جديدة تستعدين لتقديمها قريبًا؟
عندي فيلمين كوميدي، “بيج رامي” مع رامز جلال، و“101 مطافي” مع أوس أوس ومحمد عبد الرحمن، ومتأكدة إنهم هيكونوا تجربة مختلفة وجديدة.
ما الذي يجذبك لاختيار الأدوار؟
الكاست عنصر مهم جدًا بالنسبة لي، لكن في نفس الوقت لو الدور نفسه مش قوي أو مش مؤثر، ممكن أرفض حتى لو الكاست مميز
كيف ترين ردود فعل الجمهور على أعمالك؟
أنا محظوظة جدًا إن الجمهور حب الشخصيات اللي قدمتها، لكن أعتقد إن “نؤة” كانت الأقرب لقلوبهم لأنها إنسانية وحقيقية.
وفي النهاية.. ماذا تقولين لجمهورك؟
بشكرهم جدًا على دعمهم المستمر، لأن ده أكبر دافع ليا إني أقدم الأفضل دايمًا.