حسن الرداد يكشف لـ"ترند ريل" كواليس اعتذاره عن فيلم "سفاح التجمع".. ويعلن عن فيلمه الجديد "طه غريب"
كشف الفنان حسن الرداد، في تصريحات خاصة لـ"ترند ريل"، عن كواليس اعتذاره عن المشاركة في فيلم "سفاح التجمع"، مشيرًا إلى أن المسألة لم تكن بسبب عدم إعجابه بالدور، بل بسبب توقيت العمل والانشغال بمشاريع أخرى.
وقال الرداد: "كلمني صديقي المؤلف محمد صلاح العزب عن الفيلم، والفكرة كانت حلوة، ودور مهم، لكن بصراحة مبحبش الجو اللي فنان يطلع يقول (أنا اعتذرت عن الفيلم الفلاني) وكأن ده تقليل من الفنان اللي عمله، وده مش حقيقي، كل فنان بيختار بناء على وجهة نظره وتوقيته، ومش شرط إنه يكون أقل أو أكتر من حد".
وأضاف: "في البداية كنت متردد، وسمعت إن أحمد الفيشاوي هيعمل الدور، وبعدها شخص تاني، ولما عدّى وقت حسيت إني مش جاهز أعمله دلوقتي فاعتذرت، وده طبيعي، وشوفت مؤخرًا فيديو للفنان اللي بيقدم الشخصية، وبصراحة عامل شغل جميل ومحترم".
وأكد الرداد على أهمية دعم الفنانين لبعضهم قائلاً: "إحنا مش أعداء، إحنا زملاء في المهنة، وكل نجاح لأي حد هو دفعة للصناعة كلها، وبنفرح ببعض لما ننجح".
وفي سياق متصل، أعلن حسن الرداد عن فيلمه الجديد "طه غريب"، مؤكدًا أنه يعمل حاليًا على التحضير له، وقال: "الفيلم مختلف، وإن شاء الله يعجب الجمهور، وبحاول أقدّم فيه حاجة جديدة".
وعن حالته الصحية، كشف الرداد أنه تعرض لإصابة أثناء مشاركته في مباراة كرة قدم مؤخراً، قائلاً: "حصللي تمزق في أربطة الكاحل، والطبيب طلب مني التوقف عن الرياضة لمدة أسبوعين على الأقل علشان أتعافى كويس، وإن شاء الله أرجع لنشاطي الطبيعي قريب".
ويُعد حسن الرداد من أبرز نجوم جيله، حيث قدم العديد من الأدوار الناجحة في السينما والدراما، ويحرص دائمًا على التنوع في اختياراته الفنية.