هالة صدقي تشيد بيسرا : فنانة وانسانة صادقة واستمرارها نصف قرن شيء غير عادي

لم تفوت الفنانة هالة صدقي حضور الايام الاولى من فعاليات النسخة الثامنة من مهرجان الجونة السينمائي، وحرصت على وجه الخصوص على حضور ندوة تكريم زميلتها يسرا. 
صدقي قالت في تصريح خاص على هامش التكريم : يسرا تستاهل اكتر من كده، فهي في الحقيقة فنانة متميزة ومختلفة، وليست مجرد فنانة عادية، بل هي إنسانة طبيعية وانسانة صادقة جدا وعلشان كده هي كمان صادقة على الشاشة، يعني اللي بيظهر في القلب، دايما هو اللي بيطلع على الشاشة، ولأنها ست صادقة جدا وحقيقية، فهي رقم غير عادي، وان نجم يستمر بنجوميته حتى هذا السن ويفضل مطلوب، ويفضل محبوب، ويفضل الناس تحتفل بيه وتحتفي بيه، فهذا نادر.
وتابعت : أقول لها الف مبروك، والمعرض رائع جدا وتعاون الانستغرام جوه الفيديو والفيلم المعروض عنها والستائر والاكسسوار .. كل شيء رائع، ووراءه معنى، وهناك أشياء بسيطة مثل الاكسسوار و ممكن الناس لا يعرفون اهميتها، ولكن وراءها قصة كبيرة. وحينما دخلت المعرض عدت بذاكرتي إلى كل الأفلام التي شاهدتها ليسرا وتذكرت قصة كل فستان وكل اكسسوار. وأعجبتني صورتها مع محمد رضا وفريد شوقي.

اما عن رأيها في معرض يوسف شاهين، قالت صدقي : انا كنت دايما بشوف يوسف شاهين في افلامه ان انا شبهه وشبه شخوصه، يعني هو بيحب مثلا محسنة توفيق وسهير المرشدي،، وانا اشعر اني قريبة من هؤلاء الممثلين بعض الشيء. وكنت اقول انا سكة المخرج يوسف شاهين وازاي ما اشتغلتش معاه قبل كده، وفي مرة كنا في احتفالية في مصر القديمه والدنيا زحمة جدا وانا خبطت فيه فجأة، واصبحت معه وجها لوجه فقال لي انتي عينك حلوة اوي، قلت له وانت قمر، قال لي احنا ازاي ما اشتغلناش مع بعض، قلت له عشان ما شفتنيش كده الا دلوقتي. و قال لي انت معايا الفيلم الجاي، فكانت احلى خبطة في حياتي .